చెవిలో చైతన్యధార
------------------------రావెల
====================

చీకటి చిక్కబడుతున్నకొద్దీ
చిట్టి కొవ్వొత్తికి శ్వాసబిగదీసింది.
తిమిరంతో సమరమెలాజరుపాలో
అర్ధంగాక నిస్పృహకులోనయింది.

రాత్రి వడివడిగా
 విస్తరించడం మొదలెట్టింది.
నేనేమో అడుగంటూలేని
అగాధపుటంచుల్లొకి
జారిపోయినట్టుగా  చప్పుడయింది.

గాలి ఈలవేసిన చప్పుడు
అనూహ్యంగా నాకు
 అత్మీయతాశిబిరంలోకి
 రమ్మని ఆహ్వానం
మాకౌగిలోకి వచ్చి
స్వేచ్ఛగా సేదతీరమని
తరుసమూహం పలుకరింపు.

గాఢ నిద్రలోకి గబగబా
దూరిపోతున్న నాకు
జబ్బపట్టుకుని లాగుతున్న
అనుభవం ఎదురయింది.
రేపటి ఉదయం కలలోకనబడి
మనిషీ నీ భవిష్యత్తు
మహోజ్వలంగా ఉంటుందని
శుభవార్తను చెవులో చెప్పేసి
చిరునవ్వుతో నిష్క్రమించింది.
========================6-10-15